Երկրաշարժ, որը ցնցեց մեդիան

Սպիտակի ավերիչ երկրաշարժից 25 տարի անց <<Երկրաշարժ, որը ցնցեց մեդիան>> շրջիկ ցուցահանդեսը պատմում է օրվա ու ողբերգության լուսաբանման մասին:

Սեպտեմբերի 26-ին՝ Գյումրու «Սթիլ» կերպարվեստի թանգարանում տեղի ունեցավ ցուցահանդեսի բացման արարողությունը՝ Մեդիա նախաձեռնությունների կենտրոնի «Լրատուն» մեդիա թանգարան» նախագծի շրջանակներում: 

Լրատուն մուլտիմեդիա ցուցահանդես

from Internews Armenia on Vimeo.

Ըստ կազմակերպիչների <<Լրատունը>> կոչված է ներկայացնելու Հայաստանի վերջին 25 տարվա նշանակալի իրադարձությունների լուսաբանման պատմությունը. 

Ի՞նչ փոփոխությունների են ենթարկվել ԶԼՄ-ները Խորհրդային Միության փլուզումից և Հայաստանի Հանրապետության հռչակումից հետո անցած շուրջ քառորդ դարում, ինչպե՞ս են նրանք լուսաբանել երկրի համար բախտորոշ իրադարձությունները և այլն:

Եթե հայաստանյան շատ այլ ցուցահանդեսներում արգելվում է դիպչել ցուցանմուշներին, ապա այստեղ դա խրախուսվում է. այդպես ավելի շատ տեղեկություն կստանաս: 

Չորս մարզերում` Գյումրիում, Վանաձորում, Մարտունիում և Կապանում լինելուց հետո երկրաշարժի 25-րդ տարելիցի նախօրեին՝ դեկտեմբերի 6-ին, ցուցահանդեսը վերադարձել և օթևանել է Խնկո Ապոր մանկական գրադարանում: 

Նախագծի հեղինակ Վահրամ Մարտիրոսյանի խոսքով թանգարանը իր նախատիպից` վաշինգտոնյան <<Նյուզյում>> կոչվող թանգարանից, տարբերվում է նրանով, որ այստեղ նյութը ոչ միայն ցուցադրվում է, այլև մեկնաբանվում:

Ցուցահանդեսի տաղավարները ներկայացնում են հայկական, արտասահմանյան և սովետական ռուսալեզու մամուլի ամենաբնորոշ հրապարակումները և թերթերի առաջին էջերը, հեռուստատեսային ռեպորտաժներ, լուսանկարներ, վավերագրական ֆիլմեր, ինչպես նաև չլուսաբանված արխիվային նյութեր:

Մամուլի մոտ տասը հազար հրապարակումներից ընտրվել է 80 հոդված, առանձնացվել են տասը լուսանկարիչների մի քանի տասնյակ նկարներ: Իսկ թե ինչպես են լուսաբանել երկրաշարժը, պատմում են հենց լրագրողներն ու լուսանկարիչները:

Մեդիա թանգարանը, սակայն, իր այցելուներին միայն երկրաշարժի լուսաբանման պատմությունը չէ, որ առաջարկում է: 

Այստեղ <<Մեդիամարտ>> խաղի միջոցով կարելի է ստուգել և լրացնել մեդիայի վերաբերյալ գիտելիքները, ինչպես նաև <<ռեպորտաժ վարել>> աշխարհի ցանկացած վայրից` ձևօրինակման տեխնիկայի օգնությամբ:

Այժմ Վահրամ Մարտիրոսյանն իր երկու տարվա հետազոտության արդյունքները մի մութ անկյունում չկուտակելու համար բանակցում է Խնկո Ապոր գրադարանի ղեկավարության հետ, որպեսզի շաբաթը գոնե մեկ անգամ հանրությունը դրանք ուսումնասիրելու հնարավորություն ունենա:

Իսկ մինչ այդ, պետք է նոր նախաձեռնությունների մասին մտածել: <<Լրատուն մեդիանախագծի հաջորդ թեմաներն են լինելու Արցախյան պատերազմը, անկախության համար պայքարը, Հոկտեմբերի 27-ը, Մարտի 1-ը, այսինքն` այնպիսի իրավիճակներ, երբ լրագրողից պահանջվում է քաջություն և երբ լրագրողը հայտնվում է երկընտրանքի առջև` օգնել մարդկանց, թե կատարել մասնագիտական պարտականությունը:

Երկրաշարժ, որը ցնցեց մեդիան on Dipity.

     Շուշան Պողոսյան